மீலாத் மல்லித் குறிப்பேடுகள் பாகம் 6
வெளியீடு எண் = 6
மீலாது விழாவும், கிறிஸ்துமஸும் ஒன்றா?
கேள்வி :
மீலாது விழாக்கள், கிறிஸ்தவர்கள் நபி ஈஸா (அலை) அவர்களின் பிறந்த நாள்விழா கிறிஸ்துமஸ் கொண்டாடுவதற்கு ஒப்பானது. எனவே மீலாது விழாக் கொண்டாட்டங்கள் கிறிஸ்தவர்களை பின்பற்றுவதாக அமைவதால் இச்செயல் இஸ்லாமுக்கு ஏற்புடையது அல்ல என்று சில நவீனவாதிகள் சொல்கிறார்களே விளக்கம் தரவும்.
பதில் :
நபி (ஸல்) அவர்கள் முஹர்ரம் பத்தாம் நாள் ஆஷுரா தினத்தில் நோன்பு நோற்றார்கள். நோன்பு வைக்க முஸ்லிம்களுக்கு உத்தரவிட்டார்கள்.
எதற்காக இந்த ஆஷுரா நோன்பு ?
பிர் அவ்னிடமிருந்து விடுதலை பெற்றதற்காக நபி மூஸா (அலை) அவர்களும் இஸ்ரவேலர்களும் அல்லாஹ்வுக்குச் செலுத்தி நன்றி. அச்செயலை நபியுல்லாஹ் (ஸல்) அவர்கள் செய்ய வில்லையா? இஸ்லாமிய சமுதாயத்தைப் பின்பற்ற சொல்ல வில்லையா? இதனால் பெருமானார் நபி (ஸல்) அவர்கள் யூதர்களைப் பின்பற்றினார்கள். யூதர்களை பின்பற்ற சமுதாயத்திற்குக் கட்டளை இட்டார்கள் என்று கூறுவது சரியாகுமா?
நபி (ஸல்) அவர்கள் மீது முஸ்லிம்கள் வைத்துள்ள மதிப்பிற்கும், மரியாதைக்கும். கிறிஸ்தவர்கள் நபி ஈஸா (அலை) அவர்கள் மீது கொண்டுள்ள நம்பிக்கைக்குமிடையில் ஏணி வைத்தாலும் எட்டாத வேறுபாடுகள் உண்டு.
நபி (ஸல்) அவர்களை அல்லாஹ்வின் திருத்தூதராக உயர்வான அந்தஸ்துகள் வழங்கப்பட்ட ஒரு மனிதப் புனிதராக பாவங்கள் செய்யாத அல்லாஹ்வின் அடியாராக நம்பிக்கை கொண்டுள்ளனர் முஸ்லிம்கள்.
'லாயிலாஹ இல்லல்லாஹ் முஹம்மதுர் ரஸுலுல்லாஹ்' என்று முஸ்லிம்கள் சொல்லும் கலிமா அவர்களுடைய அசைக்க முடியாத நம்பிக்கை இது என்பதை தெளிவுப்படுத்துகிறது.
ஆனால் நபி ஈஸா (அலை) அவர்களைப் பற்றிய கிறிஸ்தவர்களின் பார்வையே வேறு.
நபி ஈஸா (அலை) அவர்களை இறைவனின் புதல்வர் என நம்பிக்கை கொண்டு நபியவர்களை இறைவனாகவே வழிபட்டு வருகின்றனர் கிறிஸ்தவர்கள்.
இப்படிப்பட்டவர்களின் விழாவும், ஓரிறை நம்பிக்கையாளர்களின் விழாவும் எப்படி ஒன்றாகும்?
இந்துக்கள் தமது கோவில்களையும், தெய்வங்களையும் சுற்றுகின்றனர்.
முஸ்லிம்களான நாம் ஆதி இறை இல்லமான கஃபத்துல்லாஹ்வை தவாஃப் செய்கின்றோம்.
இந்துக்கள் தமது கோவில்களுக்கு சென்று தமது தெய்வங்களுக்கு நேர்ச்சையாக்கி மொட்டையடிக்கின்றனர்.
முஸ்லிம்களான நாம் ஹஜ்ஜின்போது முடி களைகின்றோம். எனவே முஸ்லிம்கள் இந்துக்களை பின்பற்றுகின்றனர் என்று போலி ஏகத்துவவாதிகள் சொல்லத் துணிவார்களா?
எனவே மீலாது விழா என்ற மகத்தானதொரு நற்செயல் ஒரு போதும் பிற மத சகோதரர்களின் விழாக்களுக்கோ, கொண்டாட்டங்களுக்கோ, அனுஷ்டானங்களுக்கோ ஒப்பாகாது...
சுன்னத் ஜமாஅத் மாணவர் அமைப்பு (SSF) குமரிமாவட்டம்.
7598769505, 7200977182, 9894710696